رسالة للشعب التونسي :
يا واقف عل قبري اسمعني
ما تخافش ماني رهبانة
نا البارح لي حفرتو قبري
وخليت وليداتي حزانا
الجثة سكنت في قبري
والروح خرجت عريانة
تلوج ع نوارة عمري
خلتها تبكي جيعانة
نحكيلك لي صار عليا
لو تعرف قداش تعبانة
ايديا تشقت يا حني
ونعدي ليلي حيرانة
نجري عل الخبزة ونمني
ما خلطش والسعد نسانا
وكي نخلص نجري ونجري
لبياع الخضرة بحذانا
نلقاه معبيلي الكرني
نخلصهم وماني رهدانة
وعشانا شكشوكة وكسرة
والضحكة ديما رنانة
الشيب كساني في صغري
كبرني ورجلي حفيانة
كيفاش صبرت وما ندري
حتى لي سكنت الجبانة
البارح في الصبحة بدري
والنجمة باقي شعلانة
نادوني محجوبة وعكري
بلاصة في الكميون معانا
فولارة خبتلي شعري
وملية وحزامي كتانة
وركبت مع رفايق عمري
نغني كايني سلطانة
ما حسبتش عارضني قدري
ولا شفت الموت كيف جانا
والدم تبزع من صدري
شرباته الارض العطشانة
وليداتي ضاعوا من حجري
يبكوا عل الام الحنانة
ان شاء الله مع خالص شكري
في رقبة تونس امانة
غطي بالفولارة قبري
خليني نرقد مطمانة.
والسلام.
شهيدة من السبالة
بقلم عبدالعزيز مثلوثي.
