ملًا ثورة :
محلاك كي بديت الثورة
يا شعبي أنت المسكين
هزتًك مبادي الثورة
كيف قلت "ديقاج" للزًين
وغرًتك أسامي الثورة
من فل وورد وياسمين
والكل يهني بالثورة
حسبونا نولًي كالصين
طلعتلك فاشوش الثورة
والفرحة دامت شهرين
والقهوة طلعتلك مرًة
وفكوها الثورة شياطين
جاوك من ركبو عالثورة
وذبحوك بموس وسكين
قالولك لازم دراسة
نعملك دستور خشين
كل واحد عطيطو حراسة
وشهرية تمشي لسنين
وسيارة ليه ولحرًاسه
والدار ولاًت دارين
كتبو لرواحهم كرًاسة
وكتبولك انت سطرين
اش لزك تعمل في الثورة
وما حسبتش مصلحتك وين
غلًيت الخبزة بالثورة
ومصروفك حتجيبو منين
يا والله عملة فها الثورة
يخلصها ربي الحنين
إمضاء : عبدالعزيز مثلوثي
(منزل جميل، 5 فيفري 20177)
ليست هناك تعليقات:
إرسال تعليق